Bi pêşengiya Kongreya Star li Qamişloyê li dijî nevexwendina civîna derbarê destûra nû ya ji bo Sûriyeyê de meş hat lidarxistin.
Bi hezaran pêkhateyên kantona Qamişloyê û endamên hemû sazî û dezgehên Rêveberiya Xweser, partiyên siyasî, kesayetên serbixwe û rewşenbîr, bi dirûşmeya “Destûra ku em têde beşdar nebin, em qebûl nakin” daketin qadan û helwestên xwe nîşandan.
Meş ji Stada 12’ê adarê ya bajarê Qamişloyê dest pê kir, di meşê de wêneyên pakrewanên azadiyê û pankertên bi nivîsa ‘Na ji Lozaneke nû re’ û ‘Ji mafê me ye em tevlî destûrê Sûrî bibin’ hatin hildan û li pêşiya navenda netewên yekbûyî li taxa siyahî rawestiya.
Piştî deqeyeke rêz girtin ji bo pakrewanên azadiyê, Hevseroka Meclisa Rêveber a Herêma Cizîrê Nezîra Kewriyê axifî û wiha got: Em ji destûre nehatine vexwendin, banga me ji saziyên pêwendîdar re heye ku ji biryara xwe vegerin. Ji derveyî me çareserî nabe û wê destûrê we bêencam be. Em ferq û cûdahiyê qebûl nakin em hemû gelê sûriyeyê ne û dive em jî di nivîsandina destûr de hazir bin.
Meş bi dirûşmeyên “Na ji parçe kirina Sûriyeyê re” û “Bijî yekîtiya gelên Sûriyeyê ” bi dawî bû.
